Virginie Verrier zuzendariak Thinkingeko laugarren jardunaldian Frantziako futbolaren aitzindari handiaren biopicari buruz hitz egin du
Marinette Pichon Frantziako futbolaren aitzindariari buruzko “Ne jamais rien lâcher” (Ez amore eman) autobiografian oinarritutako “Marinette” filma izan da protagonista Thinking Football jaialdiaren laugarren jardunaldian. Pelikula hunkigarria da, futbolari bikain honen unerik nabarmenenak zeharkatzen dituena, haurtzaro gogorretik (tratu txarrak ematen dituen aita batekin) heldutasunera (futbolaren legenda bihurtua). Virginie Verrier zuzendariak proiekzioaren ondorengo solasaldian adierazi duenez, Marinetteren borroka emakumezkoen futbolaren borroka da Frantzian, “eta itxaropena transmititzen duen istorioa da”. Zalantzarik gabe, filmak pertsonaia protagonistaz haratago doazen eta gizarte osoari dagozkion gaiak planteatzen ditu. “Marinetteren biografian oso garrantzitsuak diren eta gaurkotasuna duten gai asko daude: berdintasuna kirolean, sexu-aniztasuna, sororitatea, genero-indarkeria…” gogorarazi du zuzendari frantziarrak.
Bigarren saio honetan, Athletic Clubeko emakumezkoen lehen bi taldeak Sala BBK aretoan egon dira. Bi taldeetako jokalari eta teknikariekin batera, Jose Angel Iribar, Ainhoa Tirapu, eta, zuzendaritzaren ordezkari gisa, Jon Ruigomez eta Josetxu Urrutia izan dira emanaldian.
Aurretik, 18:00etan, Greg Crutwellen “In the middle” filma proiektatu da. Zuzendariak ondorengo solasaldian parte hartu du. Dokumental britainiarra futbol ez profesionalean ezinbestekoak diren epaile amateurrei eta futbol profesionala existitzea posible egiten dutenei egindako omenaldi zoragarria da. Gazteak, zaharrak, gizonak, emakumeak, transexualak… arbitroak, pertsonak direnak eta atzean bizitzak eta istorioak dituztenak. Filmeko arbitroetako batek dioen bezala, “jokoa gehien maite dugunak garela uste dut”. Filmaren zuzendariak gogorarazi duenez, “arbitroek, maila baxuenetakoek bereziki, zintzotasun eta eskuzabaltasun ikaragarriarekin egiten dute. Film honekin ohoratu nahi nituen eta egindako lana eskertu “.
