Fundazioaren proiektua, Frankfurteko Azokan

 
FF WEB 4
FF WEB 3
FF WEB 2
FF WEB 1
Anterior
Siguiente
 

Galder Reguerak Athletic Cluben ekimen kulturalak aurkeztu ditu Alemaniako liburu azoka ospetsuan: “Letrak eta Futbola” jaialdia, Athletic Irakurketa Klubak eta irakurketa sustatzeko kanpainak, kartelak eta argitalpen propioak barne

Galder Reguerak, Athletic Club Fundazioaren Proiektu Arduradunak, Fundazioaren kultur proiektua aurkeztu du ostegun honetan Frankfurteko Liburu Azokan. Aurkezpena “Reading Promotion and Role Models” (“Irakurketaren sustapena eta jokabide-ereduak”) izeneko mahai-inguruan egin da, LitCam-ek antolatuta (2010etik hezkuntza eta oinarrizko gizarte-balioak sustatzen dituen erakunde independentea).

Reguerarekin batera, hitzaldian parte hartu dute Betty Becker-Kurz doktoreak, Stiftung Lesen-eko zientzialari elkartuak; Marc Lambert Scottish Book Trust-eko CEOak; eta Maszlee Malik Malaysiako kultura ministro ohi eta Selangor-eko Liburutegi Publikoko (PPAS) egungo presidenteordeak. Guztiek partekatu dituzte irakurketaren sustapenaren arloan izandako esperientziak, eta nabarmendu dute jokabide-ereduek (adibidez, futbolariek ordezkatuak) garrantzi handia dutela irakurketaren sustapenean.

Fundazioaren kultur proiektuari buruz

Fundazioaren kultur proiektuaren kasuan, Athletic Clubeko futbolarien inplikazioa erabakigarria da haurrak eta gazteak irakurtzera eramango dituzten erreferenteak ezartzeko. Hala, Iñaki Williams, Iñigo Lekue, Mikel Balenziaga, Ainhoa Tirapu eta Oscar de Marcos bezalako futbolariak izan dira IrakurLE-ON irakurketa sustatzeko kanpainaren protagonistak. Oscar de Marcosek eta Ainhoa Tirapuk, Athletic Genuineko Igor Porsetekin batera, eleberri autobiografiko laburrak argitaratu dituzte Fundazioarekin (“Togo”, “Bizitza eskukadaka”, “Williams izatea”), eta doan banatu dira ikastetxeetan eta kirol-klubetan. Gainera, idazle futbolari horiek prestakuntza-zentro horietara joan dira ikasleekin liburuei buruz hitz egitera, Athletic Irakurketa Kluba proiektuaren modalitateetako bat baita.

Athletic Irakurketa Klubaren formatu klasikoan, edozein zalek Athletic Clubeko hainbat jokalari eta teknikariri irakurtzeko liburu bat proposa dezake. Jasotako iradokizun guztietatik, ordezkari zuri-gorri bakoitzak hilabeteko epean liburu bat aukeratu eta irakurtzeko konpromisoa hartzen du. Ondoren, irakurleekin bildu eta liburuari buruz hitz egiten dute. Azken urteotan, hainbat jokalari eta teknikarik hartu dute parte ekimen honetan: Jose Angel Iribar, Carlos Gurpegui, Ainhoa Tirapu, Ernesto Valverde, Mikel Balenziaga, Mikel Rico, Mikel San José, Gorka Iraizoz, Andere Leguina, Xabi Etxeita, Maite Oroz, Lucía Córdoba…

Gainera, Lezamako Athletic Clubeko beheko kategorietako taldeek ere parte hartzen dute irakurketa klub hauetan.

Azkenik, aipatzekoa da Athleticeko futbolarien presentzia Fundazioak antolatutako solasaldi eta eztabaidetan, “Letrak eta Futbola” eta “Thinking Football Film Festival” jaialdietan.