“Grupo Emaús Fundación Social” sozial, laiko eta irabazi asmorik gabeko erakundea da, eta EMMAÜS INTERNATIONAL mugimenduko kide da. Erakundearen helburua da eraldatze-prozesu indibidualak edo kolektiboak sustatzea eta laguntzea gizartearen, ekonomiaren eta ingurumenaren eremuetan. Horretarako, Emausek gizarteratzeko eta laneratzeko programak, iraunkortasunerako sentsibilizazio- eta hezkuntza-proiektuak, garapenerako lankidetzakoak eta ekonomia solidarioko enpresak garatzen ditu. Bazterketa-egoeran edo -arrisku larrian dauden pertsonen bizi-baldintzak eta ahalduntzea hobetzea du lehentasun.

Zehazki, Emausek egoitza-zentro bat du Gamizen, eta eguneko zentro bat Derion, non gizarte-bazterkeriako egoera larrian dauden pertsonei laguntzeko programa integral bat garatzen duen. Fundazioko teknikariek zuzendutako kirol anitzeko entrenamenduak Emausek sustatutako ekimen eraldatzaileen parte dira.